小店贊助魚旦雞翼　樹仁學生甩底未取不通知　謊稱同學病倒活動取消　系會道歉

立場新聞 2017/03/23 08:52

    Facebook 專頁「SYU Secrets」日前刊出紅磡串燒店「串噹噹」店主女兒的文章，揭露樹仁大學工商管理學系系會早前就本月10日舉行的就職典禮，尋求該店贊助食物，但學生當天沒有如期現身取食物，造成浪費，留下聯絡方法的同學又不接聽電話，最後幾經轉折才聯絡上，獲告知「我哋好多同學發緊燒、我哋活動取消咗」。但樹仁大學工商管理學系系會主席植金憑昨晚發聲明，原來系會是安排失當，並未派人領取食物，更以謊言掩飾過失，向校方及同學道歉。
    「SYU Secrets」周二貼出「串噹噹」店主女兒的文章和相片，表述事件經過：

    2017年2月23日，一班自稱香港樹仁大學第七屆工商管理學系系會嘅學生去到串噹噹，話3月10日將會有就職典禮，邀請串噹噹贊助食物。廚師當晚就答應可以提供一盆麻辣魚旦同一盆雞全翼，亦叫佢哋當晚六點嚟拎。當晚我就代廚師同佢哋簽約，期間佢哋多謝前多謝後，都算有禮貌，有禮貌到我都唔好意思。

    2017年3月10日 .... 一直等到18:44分，鋪頭問我有無呢班同學聯絡方法，我叫佢哋搵返合約出嚟。上面有三個電話號碼，鋪頭打咗兩個發現一個唔通一個唔聽，已經心知不妙。同時我亦搵城大中文現莊同學幫手搵樹仁現莊同學幫手搵佢哋 .... 終於俾我哋打到個聽電話嘅，證實我哋真係信錯咗呢班同學。同學話「已經whatsapp咗你」「打過俾你但唔通」「我哋好多同學發緊燒」「我哋活動取消咗」「唔好意思」。

    同學，我諗我電話對你電話敏感喇，我一直都whatsapp緊，亦有其他人通過電話，講緊電話再有電話打嚟都有電話入功能，但偏偏就淨係收唔到你whatsapp同電話。問你幾點通知，你話六點左右。六點左右先集體發燒呀係咪？六點左右先決定取消呀係咪？....

    （節錄版本）

    樹仁大學工商管理學系系會主席植金憑昨晚發聲明，表示因未能履行承諾的同時，更以謊言掩飾過失，向校方及同學道歉，「不單浪費食物和廚師的心思，更辜負相關店舖、本校教職員、會員及同學對本會的信任，結果破壞了大學聲譽。本會再次就失信與不負責任的行為作出最深切道歉。」
    聲明指，由於安排失當，當時並未派出人手到「串噹噹」小食店領取食物，承認以「謊言掩飾過失」，植金憑稱，該會幹事已於前天到「串噹噹」小食店致歉，昨天他與部分幹事再次前往小食店向負責人道歉。