拍廣告被質疑有辱游泳專業 歐鎧淳親解「3分27秒」成績是什麼
立場新聞 2017/05/30 11:55
歐鎧淳
香港游泳女將歐鎧淳，由於樣子甜美，接拍了不少廣告，近日一個米線連鎖店的廣告（片段附文末），被網媒作者質疑廣告情節顯示區鎧淳自由式游到一個「3分27秒」的成績，不屬於任何途程的應有時間，批評廣告片導演及編劇侮辱游泳專業，而歐鎧淳卻沒有出聲。作者又嘲諷拋頭露面加入娛樂圈的人，是因為沒有其他能力。歐鎧淳今日凌晨回應，表示「3分27秒」這個時間其實正是這個微電影廣告的「彩蛋」，源自現實。
批評歐鎧淳的文章題為《侮辱自己專業既，係佢自己，定係Ｊ佢既網民呢？》，昨日（5月29日）刊於「輔仁媒體」，作者寫道：
「... 係條片入面，阿歐小姐游自由式，游到3分27，Ｄ隊友就好似食撚左弗得咁同你打氣。
3分27？掛住拍野，冇練水呀？歐鎧淳早排先叫人留意你專業，好，我就睇下你專業係點啦？
2016年，港隊代表何詩蓓於200米自由式游出1分56秒91，破香港紀錄。400米佢自己保持既香港紀錄，係4分13秒81。4×100接力，都係3分39秒94。咁3分27，請問各位盲撐歐小姐既粉絲，係咩項目呢？自由式三百米呀？
有時唔係話運動員唔係唔應該商業化，但當你拍野，你導演同你編劇係度侮辱既你專業既時候，你都唔出聲由條片出街，之後呢就仲要話人地唔撚睇你專業剩係睇你飛釘事業線同個樣 ...
... 好人好姐，做咩會做娛樂圈拋頭露面畀肥西呢Ｄ咁既撚人評頭品足？咪就係冇其他能力囉。我都係勸歐小姐，搵得好搵啦，下一波beauty客就會搵跳高女神，冇人會再煩你同講你架啦。」
歐鎧淳今日凌晨在facebook貼出回應，表示3分27秒這個時間，導演監製以至廣告客戶都與她再三確認是否值得慶祝的時間，她透露這時間其實正是這個微電影廣告的「彩蛋」，是她練習短池十個三百米自由式的平均目標時間：
呢個時間字面上並唔常見，因為呢個係我練短池十個三百自嘅平均目標時間。每一個訓練都有佢既目的，至於片中點解係三百唔係四百；第一係令訓練有多一啲變化，第二可以延長高速度嘅時間。微電影係以我目前訓練為藍本，所以唔係就咁衝一個單次嘅時間。如果只係衝一個三百米，得到嘅強度耐力效果唔高，我教練同我追求嘅係平均速度。加上我係嗰種比賽游得快過訓練嘅泳手。簡單啲講，即係從來冇喺訓練時，游到過我任何一個最佳時間，變相攞比賽時間作對比就變得冇乜意思。
歐鎧淳讚賞《侮辱自己專業既》一文的作者是運動愛好者，懂得找出香港目前最快的自由式泳手來與她作比較，但是用錯了距離與項目，而用接力項目與個人項目比較也不公道。
歐鎧淳又重申，她「拋頭露面」做運動員本分以外的事，是因為她有一個機會去嘗試用運動員身分接觸幕前工作。「我只係其中一個例子，亦希望令大家開始喺香港見到更多運動員嘅身影。我相信只要俾機會佢哋，就會有多樣性嘅發展可能」。
歐鎧淳最後寫道：「最最最後其實幾感動有呢種會用運動角度嚟評價的人。至少他仔細在意過我游泳成績，還會翻查紀錄，代表有人慢慢嘗試真正了解體育」。
相關的廣告片段，導演是黃修平和姚敏堃，編劇是陳心遙。