上周講完漢發豬膶麵，引起一些朋友注意，而且是漢發老闆的朋友，話一齊再去食，順便跟郭先生吹兩咀。

一坐低，朋友已經二話不說捉我上閣樓找郭先生，一講起怎樣由鐵皮檔做蛋牛麵，變成豬膶麵，他第一句劈頭就說：「你睇其他報紙都知喇，仲問？」我倒是明白一個故事講了十次自己都悶，無辦法喇！

雖然如此，他也略略講了一直以來的故事 (Fast forward 版) ：當年他問廚房師傅有甚麼可以加進餐牌，結果選了豬膶，並一直改良做法。郭先生說：「其實我自己唔食豬膶，但香港人鐘意就得喇！」現時挺身爽脆口感的豬膶做法也是誤打誤撞創出。所以規咩劃人生，有些小意外人生才有故事嘛！

此時出現小插曲，有個女工走上來問老闆：「我個篩呢？你係咪拎咗我個篩呀，比返個篩我，唔係點做嘢呀？」擾攘一輪，老闆還她那個篩，繼續將即食麵包裝袋逐個拆開準備午市，碎碎念說：「依家老闆都好難做，成日比員工鬧。」但其實這也證明老闆無架子，又肯親力親為，否則哪會做到如此成績？

說起上次沒吃的西多士，郭先生非常願意大談做法，又是同一個師傅（真是隱世高人）教他一個特別方法，炸出來的西多士才會外酥內綿，而且蛋味更重。我也蠻喜歡漢發的西多士，炸得剛好不油膩蛋味又香。

最後，額外點的炸豬扒，也是其中一個鎮店之寶。有甚麼秘技呢？郭先生說：「醃豬扒方法是我家一貫做開的，都是鼓油鹽糖，做出家的味道。」的確，很多時要做出美食，不用太多花巧功夫，最緊要是自己也吃得下口，才給客人吃。

後記：印象中我未試過一間食店，寫兩次介紹／評論，漢發暫時是唯一例外。而且老闆願意不斷進步，製作出更好吃的美食，並非固步自封，還是顧家好男人，郭太真幸福！

豬膶一丁 HKD34

西多士 HKD34

炸豬排 HKD29

地址：深水埗大南街 192 號

營業時間：星期一至六　07:30-17:15（售完即止）星期日、公眾假期休息

電話號碼：23807068

原刊於作者 Instagram