【國泰乜都cut】空少踢爆國泰狂削機上服務 籲乘客818罷坐
立場新聞 2015/05/26 18:29
【晚上9時40分更新內容，補充國泰航空回應。】
國泰爆發的工潮至今仍未解決，工會表明將行動升級，將在八月發起罷工，不過有市民不支持行動，甚至被網民質疑是「身在福中不知福」。近日網上流傳一篇疑似是內部職員撰寫的文章，踢爆國泰近年削減了多項機上服務，當中包括毛氈、雜誌、礦泉水、杯麵及玩具紀念包等，揚言如果乘客不滿就應該在8月18日工會擬發動罷工的日子，罷坐國泰航空。有空中服務員向《立場新聞》證實文章資料無誤，轟國泰削減服務，令前線員工愈來愈難做。
國泰晚上回覆《立場新聞》查詢，表示一直致力確保機上有充足的食品、飲料、雜誌、兒童玩具遊戲包、以及如毛毯和枕頭等用品可供乘客享用。國泰會因應機艙服務員提供的意見及顧客問卷調查就用品的數量及種類定期作出調整。
一名不願具名的國泰空中服務員接受《立場新聞》訪問，證實該網上文章的內容屬實。他解釋國泰航空在近六、七年開始，已不斷縮減大量的機上服務，客人只能夠「先到先得」。他以樽裝水為例，竟只有頭等、商務客位及馬可孛羅的會員才能每人獲發一支。而經濟艙的乘客即使是開口要求，亦不會獲發樽裝水。
另外杯麵、果仁等小食，以往客機上會確保每位乘客都有一份，不過在縮減開支後，大約只有五分一的經濟艙乘客可以享用。而餐牌上列明有雪糕提供，不過實際上只有平均每十位乘客，機上才會預備一杯雪糕。
供客人使用的毛氈亦已被削減，並非每人都有一張。該國泰空中服務員無奈表示，在毛氈不足的情況下，他們只能協助客人調較空調溫度。
該名空中服務員就炮轟，國泰近年不斷縮減服務，導致前線員工要經常拒絕客人要求，令他們的工作愈來愈難做。他舉例指，試過機上沒有足夠杯麵，只能要求客人以果仁果腹，結果被客人反問「要我食幾多包（果仁）先至飽？」在縮減服務的情況下，空中服務員成為出氣袋。
Facebook專頁「CX Secret」近日流傳的文章指，在經濟艙中多種服務近年都已經被削減。其中在短途經濟艙中，就連礦泉水都欠奉。另外每個杯麵的分量減少了一半，而且是「300個客得100個」。其他如三文治、小朋友的玩具紀念包及毛氈等，都已經被削減。以下為文章全文：
係時候大家講吓過去呢幾年，過態航空對乘客cut咗啲乜嘢喇！
每位客人都起碼有一個枕頭，一張毛氈？對唔住！Cut咗！
坐經濟想睇雜誌？對唔住！Cut咗！
坐經濟想每人一樽礦泉水？如果以前你去紐約飛15個鐘都可以施捨你嘅……不過，宜家？對唔住！Cut咗！
你部電視壞咗，空姐空少幫你整咗幾次都唔得，想要賠償？航程少過5個鐘冇㗎！有位換都冇㗎！唔係喎，以前我飛兩個鐘去曼谷都有㗎！對唔住！Cut咗！
想食杯麵？合味道size？我哋得"過態"製，size一半！食多個？300個客得100個"半size麵"㗎咋！咁食三文治啦！對唔住！Cut咗！
冇嘢食咁去瞓囉！俾個Overnight Kit我啦！對唔住！Cut咗！
小朋友玩具紀念包有喇啩？！有！終於有嘞！但係請問小朋友幾歲？7歲！對唔住！8至12歲Cut咗！
睇報紙？300客，中英文報紙加埋，我估有40份嘅……
去完日本玩，回程嘆多份日本仔整嘅飛機餐就完美嘞。咪傻豬豬啦！香港仔整咖今朝我哋喺香港帶過嚟咖咋！！！今朝？？？ 係呀！一直喺機尾廚房用冷風吹咗最少6個鐘！！
如果空姐空少對"過態"有咁多不滿，投訴，就應該唔好做，唔應該爭取
咁啲"惡晒"客知道自己都被cut cut cut，上到機咁多不滿，投訴，就應該唔好搭啦，唔好爭取呀！
你哋啲人講得啱，空姐空少係唔應該罷工，因為冇理由係我哋罷工，然後日曬雨淋去圍城！應該係你哋罷坐囉！
818罷坐啦！！！！