【黑鏡線索】 每次見到破壞法治嘅人，例如777十一哥，大義凜然咁樣去指摘人哋破壞法治，嗰種荒誕感，對唔住，但真係笑到標眼水。法治愛嚟做乜？咪愛嚟限制權力侵犯囉，咁成個社會入面，邊個最大權去侵犯他人，唔通係個包住保鮮紙嘅中學生？定係指揮配備武裝隊伍嘅高層？

每次見到擁抱程序暴力嘅人，例如777十一哥，大義凜然咁樣去指摘人哋撬門塗鴉暴力，嗰種滑稽法，對唔住，但真係笑到標眼水。議會發明嚟做乜？就係有個渠道畀大家拆掂佢，從街上引導到場內。 一個地方，原本有個議會，忽然間有人用程序暴力堵死咗，結果只係得一個，準過牛頓力學定律，就係趕返大家上街抗爭。暴政直接導致街頭抗爭，呢一點，幾年前議會被廢嘅時候，已經N咁多人預言咗，一啲都唔高深。 而當政權廢除議會不特止，仲再加多兩錢肉緊，嘴藐藐咁恥笑你哋一二百萬人鳩行幾星期，對於三人以命控訴扮睇唔到，一寸不讓只不斷重播人肉錄音機，個後果到底有邊忽好震驚呢？咁蘋果從樹上跌落地下，咪都應該震驚？而「重奪議會」作為抗爭目標嘅象徵意義，學某某話齋，就係「理所當然，天經地義」。 Startup普遍係一個後生仔嘅世界，以前唔明點解，仲好有信心，自己第時變中佬，一定都可以繼續打滾，但後來就慢慢明白箇中道理。 搞startup有兩大難度，第一，what can be done，對於可以做啲乜，後生嘅着數，係冇咁多以前嘅經驗。經驗唔係一定有害，但好難掌握得好。一般來講，不同時間相同領域嘅經驗，係難掌握過相同時間不同領域嘅經驗。即係例如，你想打破CCTVB壟斷，而單睇歷史，好大機會，你嘅結論係冇得打破，都係認命罷。但如果你見互聯網對音樂界嘅衝擊，就有理由相信，電視界將可以有類似嘅顛覆。

第二個難度，how it can be done。好記得，幾年前有學生批評，重複搞咗幾廿年嘅悼念會都係嗌口號唱歌燭光散水行禮如儀，自己第一個反應，唔係可以點？跟住雨傘開始去大台化，原來得喎，到反送中，進化到各自爬山不割席be water，網上組織眾籌簽名向外國宣傳施壓，方法上嘅不斷摸索嘗試修正，全部係以互聯網速度進行，而只有呢種速度，先可以同掌控科技嘅極權有抗衡嘅可能。 後生嘅着數，係無論目標同方法，都冇過往經驗羈絆想像，冇自我閹割各種可能，當遇上新時代嘅時機成熟，就最有本錢去打開以前打開唔到嘅缺口。所以好佩服友人前輩高健，仲可以喺科技前沿探索搞likecoin，虛懷若谷。而家成日提醒自己，身為中佬，盡量廢少啲，唔好坐喺冷氣房對住人哋個business plan指指點點，唔好介意善意提醒聽唔聽入耳，已經功德無量。

當年今日