QWERTY手機一直唔能夠成為主流玩意，主因係無論機身體積、重量，已超越PDA日漸收身標準，莫講話OL難以接受，就算商務玩家都要諗過先！呢部M600i勝在夠的骰，重量得112g，厚度更只係15mm，比摺機仲薄！據水貨佬講，今次返齊晒黑、白雙煞，尤其白色更於首日賣清，但必須留意係，水貨M600i僅支援英文顯示及輸入，至於遲啲有冇外掛中文程式，咁就不得而知喇！

M600i最令人眼前一亮就係雙鍵盤設計。所謂雙鍵盤，即係同時結合咗0-9數字鍵以及英文QWERTY咁解！與其他PDAPhone最唔同，M600i一個掣已包含2個英文字母，按鍵數目縮減一半，卻維持原來嘅QWERTY布局方式，無論打電話定輸入文件，同樣咁得心應手！至於機面和機側，亦配備專用收發E貓及上網功能掣，一㩒即達，配合埋3G上網功能，傳輸數據當然勁快啦！

當P990i仲未見街，M600i順理成章成為首部落場嘅SymbianOS9.1以及UIQ3.0平台手機。除保留過去P系特色，例如支援TouchScreen、JoyDial操作以及詳細嘅Menu選項，今集仲追加較精簡嘅「九宮格」介面，方便初玩PDAPhone人士上手，但除此之外似乎就冇新增分唇，感覺有啲可惜；至於娛樂方面，內置全屏影片和MP3播放器，加上支援勁細Size嘅M2卡，睇大量影片及聽歌都咁方便！

據機場Sales講，原來英文機市場相當之窄！好似M600i咁，據講大部份舖頭唔敢入貨，主因係買嘅人多數係本地客或自由行，冇中文用猶如判死刑一樣，除非有熟客落Order咁就例外。所以話，就算係大牌子都好，如果冇中文就難以生存。

制式：WCDMA/GSM三頻 體積：107×57×15mm 重量：112g 屏幕：26萬色QVGA芒 主要功能：雙功能鍵盤、觸屏、快速上網、3G視像短片、音樂播放器、M2記憶卡 $3,380（水/a） 查詢：（a）樂進（23806669）

當年今日