要令一件平平無奇的泳裝變得獨一無二，梗係唔少得各式各樣嘅濕碎配件，以下的加工物都係Nelson多年嚟喺深水埗專售服飾配件店舖那裏搜集得來的，有需要時佢就會擺出嚟晒冷，平均每套泳衣約花1小時改裝（因人而異），件件總數唔超過$200，但效果就好似成件名牌泳衣咁，掂！

本身是件平價而又單調冇睇頭泳衣，經一番修飾後，即時躍升為高雅迷人泳裝，上身的水晶、下身的珠仔吊飾，皆有助分散視線。Nelson說：「今年極之流行白色泳裝，唔好睇佢白白淨淨，其實好蝦人着㗎，身材唔夠凹凸有致都咪亂試。」好似model咁嘅身材當然goodfit，不過加工後，長平公主都carry到，仲多幾分型格㖭。

a.	純白三點式泳衣	$49.9 d.	BlingBling閃石水晶鏈	$20/碼 e.	白色緞帶連珠仔吊飾	$20/碼 f.	白色紗布玫瑰花裝飾	$40/碼

Top：01.頸繩綁蝴蝶結部份可以不須加工，用尺量度餘下長度，即正面看得見的部份，直接縫上玫瑰花紗布作點綴。 02.輪到胸前部份，以閃石水晶鏈在三角布邊圍一圈，用針線縫上。 Pants：03.下身部份比較簡單易縫，只須量度三角褲腰邊闊度，前前後後地繞上一整圈白色緞帶連珠仔吊飾並縫合，一件迷人泳裝便完成。

白色唔係人人着得到，一係身材好勁，一係就好平，好似Sammi咁就會着得好型喇。

鮮黃色的確好sharp，不過稍嫌單調，學Nelson話齋：「女仔通常有一大堆唔等使嘅珠仔鏈，可摷番晒出嚟砌落泳衣上面，慳番一筆。」重點係以一連串橙黃色珠鏈作裝飾，令身材平平嘅嬌軀更性感，啱晒青春活潑的甜姐兒。

b.	鮮黃色比堅尼泳衣	$49.9 g.	橙黃色大玫瑰花	約$100　 h.	橙色膠珠拼金色珠片頸鏈	約$50　 i.	橙黃色木珠鏈	約$40

Top：01.橙黃色珠片頸鏈按照頸帶長度剪出來，頭尾打好結，沿頸繩一粒粒縫上。剪出自覺最標致的一小串膠珠（大約3-4粒），於胸口中間位置作小點綴。 Pants：02.下身的三角褲釘上一排橙黃色木珠鏈，只釘前幅沿腰邊位。如果下身飾物睇起來已經好墜手，臀部位置則可免則免。 03.最後扣上大襟花，左右皆可，Nelson話：「一朵好喇！咪學汪阿姐咁掛兩朵太陽花喺心口！」

選購可任意扣上拆下的襟花，可隨意配襯之餘，清潔時都方便啲。

褐色麖皮三點式，驟眼睇悶親人，用來DIY就最好不過！只須配上充滿民族色彩的珠仔和頸鏈，野性指數爆燈。Nelson：「民族feel人人都啱襯，唔似得喱士咁難carry。」猶如小野貓上身，全場至hot係你啦！

c.	褐色麖皮三點式	$49.9 j.	民族feel紅褐色頸鏈1條	$40 k.	紅色及米黃色圓筒形木珠	$10/包（約8-10粒） l.	棕金色長扁形膠珠	$10/包（約8-10粒）

Top：01.今次唔玩頸繩，重點擺喺胸前2塊布上，以各式各樣膠、木珠，隨意地釘上，每邊大概用上30粒。注意唔好用死一款，Nelson所釘的紅色、棕色珠比例為3：7。 Pants：	02.下身唔使逐粒釘，一條頸鏈搞掂晒，要先度啱長度然後修剪頸鏈。 03.由於褲的中間部份（約5cm）唔使釘，頸鏈會垂下來，量度頸鏈時應預留長度。

頸鏈不需要緊貼腰圍縫上，中間部份唔釘，令頸鏈輕輕垂下，別有美感。

話明係DIY，買套幾嚿水嘅泳衣改裝一定唔符合經濟原則，Nelson就話：「街邊好多賣幾十蚊一套嘅泳衣都OK㗎，睇你識唔識揀啫！」語畢即鏟入灣仔散貨場，佢仲話：「唔好睇小呢類cheapcheapoutlet，隨時執到筍嘢㗎！」

後生女着乜都好睇，肥有肥着，瘦有瘦着，唔通着一件頭咩！被Nelson評為「娘爆」嘅泳裝，致命傷係上面嘅通花喱士，十足似着bra，記住顏色並唔係重點，pattern先緊要。

「野性豹女郎？Sorry，今個夏天冇你份，自己彈埋一邊罷啦！」

「今年興花花，呢套比堅尼貼晒題，粉紅花花襯翠綠色樹葉，顏色夠搶又唔會太誇，唔使DIY都夠照喇！」

當年今日