禮賓府傳出嘿嘿嘿笑之巨聲，震懾中環。這種笑，似是逆境演練，又像臉部肌肉失控，更似是打回原形，奸到出聲，笑到最後、最大！<br />想知狼的七一明日之後，網友推理：1，狼凸仍然是狼凸，嘿嘿不會自滿。2，原來七一不是想像中咁難捱，嘿，再多N個七一我都掂。3，作為狼隊首領，冇人敢劈炮，冇人，嘿嘿，even是好打得的，都唔能夠狼過我。4，從今天起，放心坐定粒六……不，索性自我升級，粒七！5，最是好景君須記，假如有孫，改名叫狼七。6，就算落實佔領中環，都冇有怕，因為，嘿嘿只有天知地知主席和我知，真命天子在西環。7，別以為份「施政匯報」是自貶成績只得C，嘿，下次一定叫「A政」。8，其實七一冇乜好驚，七月不同五月，起碼，七月冇三十五日。9，本人生於七月，七一不是難點問題，相反，七月，鬼咁和諧就真。10，最hit七一解密，等我話畀大家知，七一興風作浪的，肯定是外國勢力。斯諾登，未走㗎。周街特務刮緊佢！有人報料見到他昨日在蘭桂坊飲羅宋湯。

六月三十二日 - 陳也

史諾登走咗去莫斯科，原來變成湯漢斯電影人物，在機場過境室藏匿，湯漢斯在電影中還可以大模廝樣咁在機場內行嚟行去，而史諾登就不見蹤影噃，究竟俄國人收埋佢喺邊？CNN記者在機場過境室與其他國際媒體係咁搵，四處摷，都未見到史諾登背影。俄羅斯有一位做過KGB特務嘅總統，處事手法果然並非童子軍奧巴馬可比，史諾登在莫斯科機場越耐，事情越耐人尋味，佢嘅命運已不受自己控制，成為美俄厄三國博弈棋子，任由別人宰割了。<br />香港特區政府話要質問美國有冇侵入香港電腦，顯然係虛應故事，既然有儍嘅議員咁樣問，保安局咪又扮儍向美國質問囉，其實老早預咗美國政府唔會回答，彼此做吓戲而已。左丁山見到一位電腦專家，留美博士，在美國電腦界亦有學術地位，於是問佢：「美國NSA入侵香港電腦，是否真的？」呢位博士專家答：「NSA係世界級收集情報組織，等於足球世界嘅西班牙，香港甚麼大學、甚麼網站、甚麼政府嘅電腦系統保安，頂多係英格蘭足球嘅水平，對住西班牙，捱打而已，巴塞隆拿對車路士，車路士都只可泊架巴士喺禁區，死守啫，NSA如要入侵中文大學之HKIX，直情可以出入自如，無人發覺㖭。」香港咪有啲標準答案話：「未發現電腦互聯網流量有異常活動嘅？」博士話：「假如你個電腦互聯網日日有一百萬次點擊，NSA早已計入其中，現時流量保持不變嘅話，根本毫無意義！」<br />博士講得有理，香港電腦對住NSA，左丁山懷疑唔係英格蘭，而係大溪地足球對住西班牙，任由宰割便是，反正我地用嘅電腦係英特爾記憶體，微軟操作系統，美國甲骨文，思高科技，搜尋與電郵係Google或雅虎，手機用蘋果或Android，社交組織用facebook，有那一樣不是美國人設計發明的？微軟曾承認佢地一啲操作系統在出口前曾受美國政府檢查，在呢個過程中，美國政府已經知道晒軟件及系統之內部「門窗」在那裏，必要時就可進入啦！直至到中國、俄羅斯可以完全唔用微軟、思高、甲骨文、Google產品之前，質詢美國有無入侵香港電腦，簡直係天真無邪。

當年今日