立法會選舉工程開打，周街「政壇高人」指點迷津，信不信由你： 一，泛民無戲，必然敗給演技派本土。 二，建制沒輸，筋不再黐，反而多贏幾席。暑期更特訓大躉候選人，排排坐，坐足十粒鐘！ 三，年青人出閘脫腳，悲憤交加，反轉校園，校園列高危狂獨區，解放軍進駐機率高達八成。校委求之不得，派學生北上參加軍事營都慳番。 四，689欠7，8搵6一樣欠7，誰是7仔誰遭殃，葉劉失驚無神，七擒七縱，執個翻叮熱煎堆。 五，女人緊跟林鄭，連好打得都去脫痣改運，美容院兜客新招熱推，多like過瘦身打botox。美容界擬爭取新增功能組別，自願替政府出手，頭號脫痣目標，是青靚白淨的「眾志」男團！ 六，太多P圖，消委會接投訴爆燈，呼籲所有大媽參選人，別違反商品條例，老老實實呈示政治素顏please！ 七，高人最後叮囑：簽確認書，認輸？戇居！

簽確認輸！ - 陳也

近月蕭仔潮順頻頻請食飯，第一次係講佢母校浸會大學60周年校慶，蕭仔負責大專會堂嘅話劇大騷，第二次係佢嘅母校中學民生書院90周年校慶，要勞煩民生校友莊偉茵夫婦在私竇請食私房菜，俾蕭仔大講慶祝活動；上星期又嚟嘞，叫左丁山到陸羽二樓出席飯局，聽佢講「好聲書」。 潮州人甚愛潮州，替左丁山做白內障手術嘅林順潮教授就係潮州人，睇佢大名就知，蕭仔又係自己友啫，父親為佢改名為「潮順」，好似老早知道有人叫做「順潮」咁，費事撞到正！順潮也好，潮順也好，總之最重要就是潮州好，潮州順景，咁樣潮州鄉親先至可以順住潮流，大發特發吖嘛。 蕭潮順就真係食正電視娛樂潮流嘞，浸大畢業後順風順水，已成為香港製作界紅人，最潮之人。呢晚佢當然在開飯前講明目的，呢次唔係為浸大、民生做義工嘞，而係為全港閱讀能力不便或有障礙嘅長者做義工。二十幾年前，黃霑搵蕭仔成立一間「好聲」機構，不以牟利為目的，旨在為香港留下「好聲」，即是為前輩名伶歌手製作好聲音樂聲帶，傳於後世，等香港人一代接一代都可以聽到前人嘅聲音，一個重要作用就係讓讀書不便之人可以「聽歌」之餘亦「聽書」。 好嘞，到咗今年，蕭仔佢地製作全新一輯「好聲書」，搵到譚詠麟、葉麗儀、古天樂、李若彤等做聲演，陶傑做說書人，除推出譚詠麟「愛的根源」，葉麗儀「上海灘」，劉松仁、黃淑儀自己講自己回憶錄之外，還推出好聲金庸系列之「神雕俠侶」足本，由古天樂飾楊過，李若彤飾小龍女，謝君豪飾郭靖，黃杏秀飾黃蓉，陶傑則擔任穿針引線之說書人；還有「好聲」戲寶系列之帝女花，由羅家英擔大旗演出。如此陣容，剩係俾出場費、演出費都好惡計數，蕭仔話：「冇㗎，要付錢就會破產，人人都係為公益做義工，不過製作費、錄音費、編劇、分場等等都係成本嚟嘅，好彩搵到李嘉誠基金會首先慷慨預購咗一萬套去送俾一百間志願機構，轉送予長者、視障及傷健人士，咁就幫輕好多好多。」咁又唔同，趁書展熱潮，希望在書展繼續熱賣，以戰養戰，呢套書好似係錄音機模樣，㩒掣就可聽到，全本神雕俠侶或黃淑儀、劉松仁、葉麗儀、譚詠麟等人嘅聲音，可滿足長者或視障人士嘅聽書需要，揸車人士放在汽車上聽亦好方便。

當年今日